Goizeko beroketa ariketekin hasi da Oiartzungo XXXIV. Sagardo Eguna
Azoka, eta herriko sagardo egileen dastaketa izan dira goizean Done Eztebe plazan. Arratsaldean, txotx erraldoia.
Festa giroa gaur Elizalden. Hasi da Oiartzungo XXXIV. Sagardo Eguna. Eguraldia triste samar, baina apurka eta eguerdia pasata gehienbat hasi dira gerturatzen Done Eztebe plazara sagardoaren zaleak. Izan ere, herriko sagardogileen dastaketa zegoen antolatua 12:00etatik aurrera, eta herrian ohi denez, pausatu samar eta atzerapen apur batekin hasi dira botila berdeak irekitzen. Zerbitzariek eskarmentua zuten, lasai asko izan dira bezeroen nahiak konplitzen. Hau da, tragoskak banatzen.
Eguerdia aurretik bazen giroa plazan. Ekoizle eta artisauen azokak hartua baitzuen udalerriaren erdiguneko plazaren kanpoaldeko perimetroa; erdialdean, sagardo postuak, nola ez. Egiari jarraiki, HITZA plazan izan den bitartean (12:45ak arte) terrazeoan zebiltzanak gehiago ziren erdialdeko karpan edalontziak astintzen zebiltzanak baino. Baina ziur eguerdiak aurrera egin ahala bete-bete direla herriko sagardoa banatzen ari ziren mahaietako txokoak.
Arratsaldekoa izango da, ordea, eguneko unerik gorenena. Lehenik haurren jokoak eta txokolatada izango dira; txikienek Sagardo Eguneko parte hartzea bukatu ondoren, hasiko da txotx nagusia (18:00). Sagardo botilak fresko daude, zerbitzariak prest, pintxoak eta jatekoak bidean, eta badaezpada ere, komun publiko ibiltari sorta handia Fermiñene ondoan txiza egitea beharra delako, baina herria zaintzea betebeharra.
Jarraian, goizeko giroaren hainbat irudi.
- 17:00. Haur jolasak eta txokolatada Euskal Herria plazan.
- 18:00. Sagardo dastaketa Done Eztebe plazan.
- 20:30. Txosna, euskal musikarekin.
